Canche le mistier devënta na vocaziun
Le Lüch da ´Ciampidel tla Val Badia ne foss nia chël ch’al é aldedaincö, sc’al ne foss nia sté chës porsones che s’á dé da fá, de por de, da 13 generaziuns incá, cun pasciun y dediziun, por arjigné ca patüc da mangé sann, por zidlé i tiers sciöch’al alda y curé le raiun natural tl respet dla natöra.
Al nes é gnü metü te cöna l’amur por nosc raiun y por nosta contrada tan preziosa. Al nes stá a cör da ciaré dles ressurses che la natöra nes dá y da d’avëi respet d’ëres. La cualité vëgn dan la cuantité – te vigni situaziun dla vita.
 |
Portrait dla familia: iadô la culissa dl Lüch da Ciampidel
La familia Agreiter: Manuela y Vito cun sü mituns bele gragn Christian, Michael y Anna se fistidiëia düc deboriada dl lüch de familia y dl’aziënda familiara cun la botëga. Manuela stá scialdi tla botëga dl lüch y, sc’al é debojëgn, Ves dára val’ bun consëi y val’ spligaziun sön le patüc ch’i ciafëis da cumpré. Intratan ciara Vito cun tröp amur ch’ara ti vais bun ai tiers y se fistidiëia dl laur tla bocaria. Michael arjigna ca le patüc bele cujiné danfora, tratan che Christian manajëia la botëga y laora da bocá cun pasciun y dediziun.
|
Le bocá de Osta crëta
Christian Agreiter ti é jü do ales pedies de so pere Vito y é l’espert y la porsona de referimënt sc’ara nen vá de cern de bona cualité. Impröma orôl deventé n cogo, mo spo ál mudé idea y á metü man da imparé da bocá tla scora profescionala Emma Hellenstainer a Porsenú (2011-14). Tl 2015 ál stlüt jö dër bun l’ejam da maester da bocá a Augsburg y á spo metü man da lauré tl’aziënda di geniturs. De so laur ti plejel dantadöt da baié cun sü cliënc – dër gonot diji „Chiló ne pói nia ma cumpré cern, mo i impari ince val’ lapró“– y Christian Agreiter é contënt sc’al pó ti mostré y ti splighé a d’atri le laur da bocá te düc sü aspec.
|
|
I tëgni dër sön la produziun de patüc da mangé de de bona cualité y i sun afasciné da döt ci ch’an pó fá cun n bun produt sc’an á le savëi aladô y sc’an é coriusc. Le respet por le tier y la natöra é dër important por me te mi laur – ince porchël él sté scialdi saurí por nos da tó la dezijiun da se fá döt instësc, da canch’al nasc i vidí cina al produt final. Insciö pói garantí la cualité ch’i ó pité y me dé da fá dal mëteman inant por che le produt sides bun.
- Christian Agreiter
Vire y lauré söl Lüch da Ciampidel